नेपाली काँग्रेसका सभापति शेरबहादुर देउवाले गृहजिल्ला डडेलधुरामा सुरक्षा प्रशासन लगाएर वडा अधिवेशन गराएसँगै वरिष्ठ नेता रामचन्द्र पौडेलपक्षीय नेताहरुले महाधिवेशन निष्पक्ष हुनेमा आशंका व्यक्त गर्न थालेका छन् । आजै पौडेल समूहले निर्वाचन समितिका पदाधिकारीलाई भेटेर महाधिवेशन निष्पक्ष ढंगले सम्पन्न गर्न ध्यानाकर्षण गराउने भएको छ ।
पौडेल पक्षले आज दिउँसो २ बजेतिर समितिको ध्यानाकर्षण गराउने भएको हो । समूहले डडेलधुरामा पुनः अधिवेशन गराउनुपर्ने माग पनि गरिरहेको छ । यस्तै, बाँकी रहेका २० जिल्लामा पनि संस्थापन पक्षको भयमा नपरी निष्पक्ष ढंगले अधिवेशन गराउन सुझाव दिने समूहको तयारी छ ।
निर्वाचन समितिको ध्यानाकर्षण गराउन पौडेलसहित महामन्त्री डा शशांक कोइराला, पूर्वमहामन्त्री प्रकाशमान सिंह, कोषाध्यक्ष सीतादेवी यादव, नेताहरू अर्जुननरसिंह केसी, शेखर कोइराला, डा मीनेन्द्र रिजाललगायत सानेपा जाँदै छन् । काँग्रेसले आउँदो असोज ५ गते पार्टीको बाँकी रहेका २० जिल्लाको अधिवेशन गर्ने कार्यतालिका सार्वजनिक गरिएको छ ।
