फुटबलको सबैभन्दा ठूलो महोत्सव फिफा विश्वकप २०२६ आजदेखि शुरू हुँदैछ । अमेरिका, मेक्सिको र क्यानडाले संयुक्त रूपमा आयोजना गरेको यो प्रतियोगितालाई विश्वकप इतिहासकै सबैभन्दा ठूलो संस्करणको रूपमा हेरिएको छ ।
पहिलो पटक ४८ राष्ट्रको सहभागिता, १०४ खेल र तीन देशका १६ शहरमा हुने प्रतिस्पर्धाले यस विश्वकपलाई विशेष बनाएको छ । विश्वकपको पहिलो उद्घाटन समारोह नेपाली समयअनुसार आज मध्यराति मेक्सिको सिटी स्टेडियममा हुनेछ । प्रतियोगिताको पहिलो खेलअघि आयोजना हुने समारोहले मेक्सिकन संस्कृति, परम्परा र कलालाई विश्वसामु प्रस्तुत गर्नेछ ।
आदिवासी कलाकारहरूको प्रस्तुति, लोकनृत्य तथा सांस्कृतिक कार्यक्रम समारोहका मुख्य आकर्षण हुनेछन् । उद्घाटन समारोहपछि विश्वकपको पहिलो खेलमा मेक्सिको र दक्षिण अफ्रिका खेल्नेछन् । उद्घाटन समारोह नेपाली समयअनुसार आज राति ८:४५ बजे शुरु हुनेछ भने उद्घाटन खेल १२:४५ बजे हुनेछ । यस्तै क्यानडाको टोरन्टोमा दोस्रो उद्घाटन समारोह हुनेछ । मेक्सिको र अमेरिकाले यसअघि विश्वकप आयोजना गरिसकेका छन् भने क्यानडाले पहिलो पटक विश्वकप आयोजना गर्न लागेको हो । उद्घाटन समारोहमा क्यानडाको बहुसांस्कृतिक समाज, विभिन्न समुदाय र राष्ट्रिय पहिचानलाई सङ्गीत तथा दृश्यमार्फत प्रस्तुत गर्ने तयारी छ ।
यस्तै तेस्रो उद्घाटन समारोह अमेरिकाको लस एन्जलसमा आयोजना हुनेछ । मनोरञ्जन केन्द्र मानिने सहरमा आयोजना हुने समारोहमा अत्याधुनिक प्रविधि र अन्तर्राष्ट्रिय सङ्गीतको बेजोड प्रस्तुति गर्ने तयारी छ । तीन वटै उद्घाटन समारोहमा विश्व प्रसिद्ध कलाकारहरूले प्रस्तुति दिंदैछन् । यस पटक विश्वकपमा सहभागी ४८ टोलीलाई १२ समूहमा विभाजन गरिएको छ । हरेक समूहमा चार टोली छन् ।
समूह चरणपछि शीर्ष दुई टोली तथा तेस्रो हुनेमध्ये उत्कृष्ट आठ टोली नकआउट चरणमा पुग्नेछन् । नयाँ ढाँचाअनुसार पहिलो पटक ‘राउण्ड अफ ३२’ समावेश गरिएको छ, जसका कारण विश्वकपका कुल खेल संख्या ६४ बाट बढेर १०४ पुगेको छ । प्रतियोगितामा कुल १ हजार २ सय ४८ खेलाडी सहभागी छन् । विश्वभरका ७१ देशका ४ सय ४९ व्यावसायिक क्लबबाट खेल्ने खेलाडीहरूले आफ्नो राष्ट्रको प्रतिनिधित्व गर्दैछन् ।
पाँच पटकको विश्व विजेता ब्राजिल लगातार २३औँ पटक विश्वकप खेल्दैछ भने साबिक विजेता अर्जेन्टिना उपाधि रक्षा गर्ने लक्ष्यमा हुनेछ । फ्रान्स, स्पेन, पोर्चुगल, नेदरल्यान्ड्स र ब्राजिललाई पनि प्रमुख दाबेदारका रूपमा हेरिएको छ । यस विश्वकपमा एसियाका जोर्डन र उज्बेकिस्तान, अफ्रिकाको केप भर्डे तथा क्यारेबियन राष्ट्र कुराकाओले पहिलो पटक सहभागिता जनाउँदैछन् । यी टोलीहरू पहिलो सहभागितामै नकआउट चरणमा पुग्ने लक्ष्यसहित मैदान उत्रनेछन् ।
विश्वकपको अर्को आकर्षण विश्व फुटबलका चर्चित स्टार खेलाडीहरू हुन् । पोर्चुगलका क्रिस्टियानो रोनाल्डो र अर्जेन्टिनाका लियोनल मेसी दुवैले फिफाको सबैभन्दा प्रतिष्ठित प्रतियोगितामा आफ्नो छैटौँ सहभागिता जनाउँदैछन् । अन्तर्राष्ट्रिय फुटबलको अन्तिम चरणतर्फ अग्रसर यी दुई खेलाडी सम्भवतः अन्तिम पटक विश्वकपमा देखिंदैछन् ।
रोनाल्डो ४१ वर्षका भइसकेका छन् भने मेसी ३९ वर्ष लाग्दैछन् । यस्तै उमेरले चार दशक कटेका क्रोएसियाका कप्तान लुका मोडरिच र मेक्सिन गोलकिपर गुइलेमो ओचाओ पनि यस पटक विश्वकप खेल्दैछन् । यी बाहेक ब्राजिलका नेमार, बेल्जियमका केभिन डे ब्रुएना, इजिप्टका मोहमद सालाह जस्ता खेलाडीका लागि यो विश्वकप अन्तिम विश्वकप बन्न सक्ने अनुमान छ ।
यस विश्वकपमा सबैभन्दा पाका खेलाडी स्कटल्याण्डका ४३ वर्षीय क्रेग गोर्डन र सबैभन्दा कान्छा खेलाडी मेक्सिकोका १७ वर्षीय गिल्बर्टो मोरा हुन् । दुवै खेलाडी विश्वकपमा डेब्यु गर्ने तयारीमा छन् । यिनै चर्चित खेलाडीसँगै सांस्कृतिक कार्यक्रम, विश्व प्रसिद्ध कलाकारहरूको प्रस्तुति, अत्याधुनिक प्रविधि र विश्वभरका करोडौँ समर्थकको उत्साहबीच शुरु हुन लागेको फिफा विश्वकप २०२६ ले अबको एक महिनाभन्दा बढी समय विश्व खेलकुदको केन्द्रबिन्दु बन्ने अपेक्षा गरिएको छ ।
मेसी र रोनाल्डोको सम्भावित अन्तिम विश्वकप तथा नयाँ पुस्ताका खेलाडीहरूको उदयले यो संस्करणलाई अझ ऐतिहासिक बनाउने विश्वास गरिएको छ ।
