अविरल वर्षासँगै आएको बाढीले देशका विभिन्न स्थानमा धनमाल नष्ट गरेको छ ।
दार्चुलाको अपिहिमाल गाउँपालिका–४ मट खोलामा बुधबार आएको बाढीले सोही ठाउँस्थित मट खोला गाउँ र भट्टाड गाउँ जोड्ने काठे पुल बगाएको छ । पुल बगाउँदा आवतजावतमा बाधा परेको छ ।
नुवाकोटको शिवपुरी गाउँपालिका–७ चापाकोटमास्थित ठाडो खोलामा बुधबार राति आएको बाढीले बा.९६ प ९८९७ नम्बरको मोटरसाइकल बगाएको छ ।
खोलाले मोटरसाइकल बगाएको भन्ने खबर प्राप्त हुनासाथ अस्थायी प्रहरी पोष्ट गुर्जेबाट खटिएको प्रहरीले मोटरसाइकल चालक बिदुर नगरपालिका–९ किम्ताङ बस्ने ३५ वर्षीय सुक बहादुर तामाङलाई उद्दार गरी उपचारका लागि काठमाडौं पठाएको छ । खोलाले सडकमा गेगर बगाई ल्याउँदा सडक अवरोध भएकोले खुलाउने पहल भइरहेको छ ।
बाजुराको हिमाली गाउँपालिका–५ क्युडीस्थित क्युडी खोलामा बुधबार आएको बाढीले सोही ठाउँ बस्ने अभिमान लुहारको बाख्राको खोर र ८० घर परिवारको धान रोपेको खेत बगाएको छ ।
घटनास्थलमा तत्काल खटिएको प्रहरीले आवश्यक उद्दार कार्य गरिरहेको छ ।
