बुटवलको मोतीपुर औद्योगिक क्षेत्रमा गोली चल्दा ४ जनाको मृत्यु भएको छ भने ३० जना घाइते भएका छन् । भैरहवा मेडिकल कलेज लैजाने क्रममा गोली लागेका तीन जनाको मृत्यु भएको हो । यसैगरी एक जनाको अस्पतालमा मृत्यु भएकाे छ ।
मेडिकल कलेजमा अहिले ५ जना प्रहरी र ८ जना सर्वसाधारणको उपचार भइरहेको छ । यसैगरी लुम्बिनी प्रदेश अस्पतालमा पनि गोली लागेका ६ जनाको उपचार भइरहेको अस्पतालले जनाएको छ । प्रहरी स्रोतका अनुसार १५ जना सर्वसाधारण र १६ जना प्रहरी घटनामा घाइते भइ उपचारत रहेका छन् ।
आइतबार बिहानैबाट मोतीपुर औद्योगिक क्षेत्रमा सुकुम्बासी भनिएकाहरु र प्रहरीबीच झडप हुँदै आएको थियो भने दिउँसो अवस्था नियन्त्रण बाहिर पुगेपछि स्थितिलाई नियन्त्रणमा दिन प्रहरीले गोली चलाएको थियो । औद्योगिक क्षेत्रमा अस्थायी रुपमा बनाइएका टहराहरू भत्काउन खोज्दा सुकुम्बासी र प्रहरीबीच झडप भएको हो ।
यसैबीच तनाव शान्त नभएपछि स्थानीय प्रशासनले साँझदेखि अर्को आदेश नआउँदासम्मको लागि यस क्षेत्रमा कर्फ्यु आदेश जारी गरेको छ ।
