काठमाण्डौ, १८ असार । सामाजिक क्षेत्रमा उत्कृष्ट कार्य गरेवापत अमेरिकाबाट सन् २०१० मा ‘सिएनएन हिरो’ बाट सम्मानित भएकी माइती नेपाल संस्थाकी संस्थापक अध्यक्ष अनुराधा कोइरालाले सोमबार शान्तिनगरस्थित बेबिलोन नेशनल स्कुलका विद्यार्थीलाई पुरस्कार वितरण गरिन् ।
म्युचुअल एकेडेमिक एक्टिभिटिज फोरम (माफ) ले हालै आयोजना गरेको अन्तर विद्यालय अंग्रेजी भाषा वक्तृत्वकला प्रतियोगितामा पहिलो भएर पुरस्कृत भएकी बेबिलोन स्कुलकी ८ कक्षाका छात्रा काव्या ढकाललाई अध्यक्ष कोइरालाले ट्रफि र प्रमाणपत्र वितरण गरेकी थिइन् ।
माफका सदस्य विद्यालयका १६ विद्यार्थीवीच भएको सो प्रतियोगितामा छात्रा काव्या पहिलो भएकी थिइ्न भने विद्यालयले पनि ट्रफि जितेको थियो ।
बेबिलोन एजुकेशन फाउण्डेशनका अध्यक्ष तेज बहादुर राई, बेबिलोन विद्यालय व्यवस्थापन समितिका अध्यक्ष प्रकाश आचार्य, बेबिलोन स्कुलका प्राचार्य राजु राई, काठमाण्डौ महानगरपालिका वडा नं ३१ का अध्यक्ष सरोज ढकाल तथा पुरस्कृत छात्रा काव्याको बुबा राजिव दिप ढकालको उपस्थितिमा अध्यक्ष कोइरालाले छात्रा काव्यालाई ट्रफि र प्रमाणपत्र वितरण गरेका थिए।
नेपाल सरकारको मन्त्री तथा बागमती प्रदेशको प्रदेश प्रमुख समेत भईसक्नुभएकी समाजसेवी कोइरालाले पछिल्लो समय शिक्षाका कारण नेपाली महिलाहरु माथिल्लो दर्जासम्म पुगेको उल्लेख गर्दै महिलाहरु पढाईको साथै समाजको हरक्षेत्रमा समानान्तररुपमा अघि बढ्नुपर्ने कुरामा जोड दिइन् ।
आफुले सञ्चालन गरेको संस्था माइती नेपालको स्थापनाकालदेखि हालसम्म भए गरेका कामबारे विद्यार्थीहरुलाई बताउँदै अहिले पनि माइती नेपालले नेपाल भारतको सीमाबाट बेचिन लागेका चेलीहरुको उद्धार गरिरहेको बताइन् ।
कार्यक्रममा अध्यक्ष कोइरालालाई विद्यालयको तर्फबाट मायाको चिनो प्रदान गरिएको थियो ।
