राष्ट्रिय स्वतन्त्र पार्टीका सभापति रवि लामिछानेले कान्तिपुरको कुनै हैसियत नभएको उल्लेख गरेका छन् । ग्यालेक्सी टेलिभिजन र केही सहकारीसँग जोडेर सहकारी घोटालामा लामिछानेको प्रत्यक्ष संलग्नता भनी लगातार समाचार लेखिरहेको भन्दै आक्रोशित शैलीमा उनले सामाजिक सञ्जाल फेसबुक मार्फत यसको खण्डन गर्दै आइरहेका छन् ।
लामिछानेले भर्खरै फेस्बुकमा लामो स्टाटस लेख्दै अब कान्तिपुर आफुले जवाफ दिइरहनु पर्ने हैसियतमा नरहेको उल्लेख गरेका छन् ।
अब कान्तिपुर मैले जवाफ दिइरहनु पर्ने हैसियतमा रहेन । तैपनि शुभचिन्तकहरुलाई भ्रम नपरोस् भनेर यति लेख्दै म सार्वजनिक सुनुवाइ मार्फत जनताको कठघरामा उभिदै छु। सहकारी घोटालामा मेरो प्रत्यक्ष संलग्नता भनेर फ्रन्ट पेजमा ठूलो हेडलाइन राखेर समाचार आएपछि अप्रत्यक्ष प्रमाणमात्र देखाएर पुग्दैन। कान्तिपुरले सुप्रिम सहकारीको रकम गोरखा मिडिया नेटवर्कको खातामा सिधै ट्रान्सफर गरियो र त्यो काम मैले गरेको आरोप लगाएको छ र त्यसमा अक्षर त्यति प्रष्ट नभएको एउटा डिपोजिट स्लिपलाई प्रमाण देखाउन खोजिएको छ। मेरो प्रत्यक्ष संलग्नता हुन सुप्रिम सहकारीमा मेरो खाता हुनुप¥यो, अनि मैले त्यसका बचतकर्ताको रकम त्यसमा सारेको हुनुप¥यो, त्यसपछि त्यो सहकारीको खातामा रहेको रकम मैले गोरखा मिडिया नेटवर्कको बैँक खातामा सारेको हुनुप¥यो।
तर कान्तिपुरले न सुप्रिम सहकारीको कसको नाममा रहेको खाताबाट त्यो रकम ट्रान्सफर भएको भन्ने लेखेको छ, न मैले नै त्यो रकम बैँकमा जम्मा गरेको प्रमाण दिन सकेको छ। खाता नै नभइकन कुनै सहकारीको रकम कसैले कुनै कम्पनीको बैँक खातामा ट्रान्सफर गर्न मिल्छ कि मिल्दैन भन्ने अति सामान्य कुरा देशको यति ठूलो मिडियाका पत्रकारहरुले नबुझेको कसरी मानौँ ? तर हुँदो रहेछ। फगत् एउटा डिपोजिट स्लिपमा मेरो पनि नाम कसैले लेखेकै भरमा मेरो प्रत्यक्ष संलग्नता भएको ठूलो हेडलाइनसहितको समाचार बन्न यस्ता सामान्य आधारभूत तथ्यमा समेत विचार गरिएन। कसैले कैलाश सिरोहियाको नाममा कसैको बैँक खातामा रकम जम्मा गरिदियो भने दोषी त्यो मान्छे हुन्छ कि कैलाश सिरोहिया? फेरि बैँकले एक लाख रुपैयाँभन्दा बढी नगद खातामा जम्मा गर्दा डिपोजिट गर्नेको परिचय खुल्ने कागजात पनि माग्ने कुरा त सबैलाई थाहै भएको कुरा हो। एक करोड रकम जम्मा गर्नेको हस्ताक्षर वा पहिचान हुने कागजात बैँकले राखेन होला र? त्यसमा मेरो केही नदेखिएकै कारणले त लेखिएन होला।
समाचारमा नै सहकारीको रकम ट्रान्सफर गर्न सहकारीका कर्मचारीलाई लगाइएको लेखिएको छ। यसबाटै म यसमा प्रत्यक्ष संलग्न नरहेको पुष्टि हुन्छ। न म सहकारीको बचतकर्ता वा खातावाला हुँ, न सहकारीको पदाधिकारी। अनि मैले मसँग सम्बन्ध नै नरहेको सहकारीको रकम कसरी अर्को खातामा ट्रान्सफर गर्न लगाउने हैसियत राख्छु ? यति धेरै खोज पत्रकारिता गर्नेले रकम जम्मा गर्न लगाइएको व्यक्तिलाई कसले त्यसो गर्न लगाएको हो भनेर सोध्न पनि सकेन। जनविश्वास गुमाउँदै गएको आरोप लागिरहेको पत्रकारिताको केही त मान राख्दिनुस्।
यसअघि बिहिबार कान्तिपुर रष्ट्रिय दैनिकले आफ्नो पहिलो पृष्ठमा सहकारी घोटालामा लामिछानेको प्रत्यक्ष संलग्नता, बुटवलको सहकारीबाट करोड उठाएर ग्यालेक्सी टीभीमा सेयर शीर्षकमा समाचार लेखेको थियो । समाचारमा रवि लामिछानेका तर्फबाट बुटवलको सुप्रिम सहकारीको खाताबाट गोरखा मिडिया नेटवर्कको खातामा १ करोड रुपैंयाँ २०७८ वैशाख ५ गते ट्रान्सफर भएको उल्लेख छ ।
ट्रान्सफर भएको रकमको भौचर समेत कान्तिपुरले पहिलो पृष्ठमा छापेको थियो भने रवि लामिछाने गृहमन्त्री भएका बेला अघिल्लो वर्षको पुस ११ गते ग्यालेक्सी टिभीका कुमार रम्तेल, रास्वपा उपसभापति डोलप्रसाद अर्याल र ग्यालेक्सी टीभीका अध्यक्ष जिबी राईसँगै लामिछानेले खिचेको तस्बीर पनि प्रकाशित गरेको थियो । सोही समाचारमाथि आपत्ति जनाउँदै लामिछानेले पछिल्लो फेसबुक स्टाटस लेखेका हुन् ।
उनले लेखेको स्टाटसको पूर्ण पाठ यस्तो छ ।
