सभामुख अग्नि सापकोटाले असंवैधानिक संसद् विघटनबारे कानुनी परामर्श गर्नका लागि आज दिउँसो १ बजे संसद् भवनको ल्होत्से हलमा बस्नेगरी उनले संविधानविद् एवं न्यायिक क्षेत्रका विज्ञहरूलाई बोलाएका छन् ।
सभामुखका प्रेस सल्लाहकार श्रीधर न्यौपानेका अनुसार सापकोटाले विज्ञहरूसँग संसद्को असंवैधानिक विघटनबारे राय लिनेछन् ।
८ जेठमा प्रधानमन्त्री केपी ओलीले दोस्रो पटक संसद् विघटन गरेका थिए । त्यसअघि ५ पुसमा उनले संसद् भंग गरिदिएका थिए । तर, ११ फागुनमा सर्वोच्चले संसद् पुनस्र्थापित गरिदिएको थियो ।
त्यसपछि ओलीले संविधानका धारा नाघेर पुनः संसद् विघटन गरेको भन्दै चौतर्फी विरोध भइरहेको छ ।
सभामुख सापकोटाले प्रधानमन्त्रीको यो कदम असंवैधानिक भनेका छन् । यसबारे विज्ञका राय लिएर अघि बढ्न सभामुखले छलफल गर्न लागेका उनका प्रेस सल्लाहकार न्यौपानेले बताए ।
