मध्य चैतबाट आन्दोलन गर्ने तयारीमा रहेको राष्ट्रिय प्रजातन्त्र पार्टीभित्रको विवादले उग्र रुप लिँदै गएको समाचार सार्वजनिक भइरहेका बेला पार्टी अध्यक्ष राजेन्द्र लिङदेनको कार्यकक्षबाहिर एक जना व्यक्तिमाथि निर्घात कुटपिट भएको छ । पार्टी केन्द्रीय कार्यसम्पादन समितिको बैठकका विषयमा जानकारी दिन पत्रकार सम्मेलन गर्नुपूर्व नेताहरु बाहिर निस्कने क्रममा कुटपिट भएको हो । कसले कसलाई के कारणले कुटपिट गरेको हो भन्ने विषयमा यो समाचार तयार पार्दा सम्म पुष्टी हुन नसकेपनि राप्रपाभित्रको विवादकै विषयलाई लिएर कार्यकर्ताहरुबीच कुटपिट भएको हुन सक्ने आंकलन गरिएको छ । पार्टी बैठकका विषयमा जानकारी गराउँन नेताहरु पत्रकार सम्मेलन कक्षमा जान लागेका थिए । अध्यक्ष राजेन्द्र लिङदेनको कार्य कक्षबाहिर रवीन्द्र मिश्र, उद्धव पौडेल, ज्ञानेन्द्र शाही लगायतका नेताहरु निस्कँदै थिए । ठिक त्यही समयमा एकजना व्यक्ति दौडँदै लिङदेनको कार्यकक्ष बाहिर आइपुगे । त्यहीक्रममा अध्यक्ष लिङदेनको कार्यकक्ष बाहिरको ढोकामै ती व्यक्तिलाई अन्य केहीले कुट्न थाले । मुक्कै मुक्का प्रहार हुन थालेपछि आक्रोशित भीडलाई नेताहरुले रोकेका थिए । थप कुटाई खानबाट जोगाएर ती व्यक्तिलाई नेताहरुले लिङदेनको कार्यकक्षभित्र प्रवेश गराएका थिए ।
सार्वजनिक भएको एक भिडियोमा कुटाई खाने ती व्यक्तिले कोर्ट पाइन्ट लगाएका छन् भने उनलाई मास्क लगाएका केही व्यक्तिले मुक्का प्रहार गरिरहेका छन् । भिडियो हेर्दा ती व्यक्तिले लिङदेनको कार्यकक्षमा पुग्नुअघि नै कुटाई खाएको अनुमान गर्न सकिन्छ । पार्टी कार्यालय परिसरमा त्यसअघि कुटाई खाएका ती व्यक्तिलाई एउटा समुहले लखेट्दै अघि बढिरहेको थियो भने उनी भाग्ने क्रममा पार्टी अध्यक्ष राजेन्द्र लिङदेनको कार्यकक्ष बाहिर पुगेका थिए । टाउको र मुखमा ताकेर मुक्का प्रहार हुन थालेपछि उनले औंला ठड्याएर त्यो समुहमाथि केही भन्न खोजिएजस्तो भिडियोमा देखिन्छ । तर, लगातार मुक्कार प्रहार हुन थालेपछि ती व्यक्ति पार्टी अध्यक्ष राजेन्द्र लिङदेनको कार्यकक्षभित्र प्रवेश गर्न खोज्छन् । लिङदेनको कार्यकक्षभित्र प्रवेश गर्नका लागि ढोका उघार्न लागेका ती व्यक्तिको टाउकोमा लगातार प्रहार भएको देखिन्छ । ढोका उघार्नेबित्तिकै भित्रबाट बुद्धिमान तामाङ, दीपक सिंह राप्रपाका मुख्य सचिव केदारबहादुर अधिकारी लगाएतका नेताहरु बाहिर निस्कन्छन् । मुख्यसचिव केदारबहादुर अधिकारी अकस्मात आफ्नै अघि मान्छे कुटिन थालेपछि अलमलमा पर्छन् भने बुद्धिमान तामाङ, दीपक सिंह लगाएतका नेताहरु भिडलाई रोक्न खोज्छन् । सार्वजनिक भएको भिडियोमा हातमा फायल बोकेका राप्रपा मुख्यसचिव केदारबहादुर अधिकारी भिडदेखि तर्किदै फायल बोकेर अघि बढेको देखिन्छ ।
राप्रपाको पार्टी कार्यालय र त्यसमा पनि अध्यक्ष राजेन्द्र लिङदेनकै कार्यकक्षको ढोकामै भएको यो घटनाका विषयमा भने राप्रपाले केही बोलेको छैन । कोशी प्रदेशको सभामुखको विषयलाई लिएर राप्रपाका माथिल्लो तहका नेताहरुबीच भएको दन्त बझान केहीदिनदेखि रोकिएको भएपनि त्यसको असर कार्यकर्ता तहमा नराम्रोसँग देखिएको छ । माथिल्लो तहका नेताहरुले आ आफ्ना पक्षका कार्यकर्तालाई उचालेर आफूहरु भने रमिता हेर्न व्यस्त भएको राप्रपाकै केही नेताहरुको भनाई छ । माथिल्लो तहका नेताहरुबीचको इगोले कार्यकर्ताहरुलाई आगो बनाएको छ भने आगो बनेका कार्यकर्ताहरु आपसी मारपिटमै उत्रिएका छन् । केही समयअघि बसेको राप्रपा आन्दोलन तयारी समितिको बैठकमा काठमाडौंका एक जिल्ला तहका नेताले पार्टीका ठूला नेताहरु आपसमा नमिले कुटिदिने चेतावनी दिएका थिए । माथिल्लो तहका नेताहरु नमिल्दा कार्यकर्ता तहमा निराशा पैदा भएको बताउँदै उनले नेताहरुलाई तत्काल मिल्न भनेका थिए । तर, नेताहरुको शीतयुद्ध तत्कालका लागि सकिएपनि कार्यकर्ताहरुबीच भने त्यतिबेलाको विवादको तुष अझै मेटिएको छैन । गणतन्त्र ढाल्नका लागि आन्दोलन गर्ने भनेर प्रचण्ड नेतृत्वको सरकारलाई राप्रपाले ४० बुँदे ज्ञापनपत्र पेश गरेको छ भने राप्रपाको पार्टी कार्यालयमा पुगेका नेता कार्यकर्ताहरु आफू आफूबीचमा मारमुङग्रीको तहमा उत्रिएपछि यसले राप्रपाका शुभेच्छुकहरुलाई निराश बनाएको छ ।
