धनगढीमा एक जना युवकको कुटपिटबाट मृत्यु भएको छ । मृत्यु हुनेमा धनगढी उपमहानगरपालिका–८ का ३५ वर्षीय महेश राना रहेको जिल्ला प्रहरी कार्यालय धनगढीले जनाएको छ । उनको सोमबार राति छिमेकीको कुटपिटबाट मृत्यु भएको प्रहरीले बताए।
प्रहरीका अनुसार राना राति स्थानीय मिनबहादुर चौधरीको घरमा प्रवेश गरेका बेला उनीमाथि निर्घात कुटपिट भएको थियो । कुटपिटबाट गम्भीर घाइते भएका रानाको उपचारका क्रममा सेती प्रादेशिक अस्पतालमा मृत्यु भएको प्रहरीले जानकारी दिए ।
रानाको हत्या अभियोगमा मिनबहादुर चौधरी दम्पतीसहितका पाँच जना पक्राउ परेका छन् । पक्राउ पर्नेमा मिनबहादुरकी श्रीमती २९ वर्षीया पुनम चौधरी, छोरी र अन्य दुई जना रहेको प्रहरीले जनाएको छ ।
मृतक राना र उनीमाथि कुटपिट गर्ने चौधरी दम्पती छिमेकी समेत हुन् । राना चौधरीको घरभित्र प्रवेश गरेका बेला उनीमाथि कुटपिट भएको थियो । कुटपिटबाट गम्भीर भएपछि रानालाई स्थानीयले अस्पताल पुर्याएका थिए ।
के कारणले उनीमाथि कुटपिट भएको हो भन्नेबारे खुलिनसकेको र घटनाबारे थप अनुसन्धान भइरहेको प्रहरीले जनाएको छ ।
