Logo
२०८१, ३२ असार सोमबार
|  Mon Jul 15 2024

खच्चडको उद्धारमा खटिएका २ प्रहरी पुरस्कृत


कर्णाली नदीमाथिको झोलुङ्गे पुलमा फसेका खच्चडको उद्धारमा खटिएका २ जना प्रहरी पुरस्कृत भएका छन् ।

प्रहरी प्रधान कार्यालय र कर्णाली प्रदेश प्रहरी कार्यालयले उद्धारमा खटिएका दुई प्रहरीलाई छुट्टाछुट्टै पुरस्कृत गरेका हुन् । पुरस्कृत हुनेमा इलाका प्रहरी कार्यालय कालेकाँडा अछामका असई रामसिंह फराल र सोही कार्यालयका हवल्दार गंगाराम चौधरी छन् । उनीहरुलाई अभिलेखमा गनिने गरी नगदसहित पुरस्कृत गरिएको कर्णाली प्रदेश प्रहरी कार्यालयले जनाएको छ ।

त्यसैगरी उनीहरुलाई प्रहरी प्रधान कार्यालयले पनि पुरस्कृत गरेको छ । साहसिक कार्य गरेको भन्दै उनीहरुलाई पुरस्कृत गरिएको प्रहरी प्रधान कार्यालयले जनाएको छ । २७ जेठमा अछामको पञ्चदेवल नगरपालिका–९ चिल्तडास्थित कर्णाली नदीमाथिको झोलुङ्गे पुलको लठ्ठा चुडिएपछि १३ वटा खच्चड बीचमै फसेका थिए ।

उद्दार गरिएका मध्ये २ खच्चड मरेका थिए भने ११ वटा खच्चडलाई जीवितै उद्धार गरिएको थियो । उक्त झोलुंगे पुलले सुदूरपश्चिम र कर्णाली प्रदेशलाई जोड्ने गर्दछ । पुलले अछामको पञ्चदेवल बिनायक नगरपालिका ९ र दैलेखको आठबीस नगरपालिका ४ लाई जोड्छ ।

झोलुङ्गे पुलको लठ्ठा चुँडिएपछि स्थानियहरुलाई आउजाउ गर्न समस्या भएको जनाइएको छ ।


प्रतिक्रिया दिनुहोस !
विचार