Logo
२०८१, १ श्रावण मंगलवार
|  Tue Jul 16 2024

नेपालमा काम गर्न आउने विदेशी नागरिकको सङ्ख्या उल्लेख्य


अब विदेशी नागरिकहरु पनि नेपालमा काम गर्नका लागि आउन पाउने भएकोे छ । अहिलेसम्म दुई हजार ३३६ विदेशीले नेपालमा काम गर्न अनुमति पाइसकेका छन् ।

नेपालमा श्रमका लागि आएका दुई हजार ३३६ विदेशी मध्ये अहिलेसम्म चिनियाँ नागरिकको सङ्ख्या उल्लेख्य रहेको पाइएको छ । उनीहरु श्रम स्वीकृति लिएर नेपाल आएका हुन् । श्रम तथा व्यवसायजन्य सुरक्षा विभागले सार्वजनिक गरेको तथ्याङ्क अनुसार चिनियाँ नागरिकको सङ्ख्या धेरै देखाएको हो । विभागले सार्वजनिक गरेको तथ्याङ्क अनुसार नेपालमा रोजगारीका लागि ६९ देशका नागरिकले श्रम स्वीकृति लिएकामध्ये सबैभन्दा बढी चिनियाँ छन् ।

विभागले चालु आर्थिक वर्ष २०८०–८१ को ११ महिनामा सरकारले दुई हजार ३३६ विदेशी नागरिकलाई काम गर्ने अनुमति (श्रम स्वीकृति) दिएको जनाइएको छ । श्रम ऐनमा नेपालमा सञ्चालन भएका प्रतिष्ठानले पाँच प्रतिशत मात्र विदेशी श्रमिक राख्न सकिने प्रावधान छ ।

नेपालमा खासगरी विदेशी लगानीमा निर्माण भइरहेका ठुला आयोजना तथा परियोजनामा काम गर्न विदेशी आउने गरेका छन् । रोजगारीका लागि दैनिक औसतमा दुई हजार जनशक्ति विदेश गइरहेको अवस्थामा सरकारले उच्च दक्ष जनशक्ति नपाउँदा विदेशी नागरिकलाई काम गर्ने अनुमति दिँदै आएको छ ।

यसअघि आर्थिक वर्ष २०७९–८० मा विकास साझेदार कम्पनीको लगानीमा नेपालमा सञ्चालित परियोजना तथा विदेशी व्यावसायिक कम्पनीमा काम गर्न नेपालबाट श्रम स्वीकृति लिने विदेशीको सङ्ख्या दुई हजार ९९४ रहेको विभागको तथ्यांकमा उल्लेख छ ।


प्रतिक्रिया दिनुहोस !
विचार