नागरिक उन्मुक्ति पार्टी (नाउपा) की अध्यक्ष रञ्जिता श्रेष्ठ चौधरीले आफूलाई संसदीय दलको नेताबाट हटाएकोबारे अनविज्ञता प्रकट गरेकी छिन् । फर्जी पत्र देखाउँदैमा दलको नेता परिवर्तन नहुने रञ्जिताले बताएकी छिन् ।
‘फर्जी पत्र देखाउँदैमा संसदीय दलको नेता फेरिएको मानिँदैन । पत्रको वैधानिकता संसद्ले हेर्ला,’ उनले भनिन् । आइतबार बसेको नाउपाको संसदीय दलको सचिवालयको बहुमत सदस्यहरूले रञ्जितालाई दलको नेताबाट हटाएका थिए । बहुमत सदस्यको बैठकले रञ्जितालाई हटाएर संसदीय दलको नेतामा सांसद गंगाराम चौधरी डगौरालाई चयन गरेको हो ।
उनले आफुलाई कुनैपनि जानकारी नभएको बताएकी छिन् । रञ्जिताले अरुण चौधरीलाई बुझ्दा अरुणको पुरानो हस्ताक्षर राखेर निर्णय सार्वजनिक गरिएको बताएकी छिन् । अरुणले बैठक नै नबसेको रञ्जितालाई बताएका थिए ।
पार्टीको केन्द्रीय कमिटी बैठक पनि नबसेको भन्दै आफूलाई कुनै जानकारी नरहेको उनको भनाइ छ । यसका बारेमा केही न केही उपाय हुनसक्ने रञ्जिताको भनाई छ । उनले भनिन्, ‘उहाँहरूलाई दलको नेता परिवर्तन गर्ने मनसाय र विचार भएको भए सरसल्लाह हुन्थ्यो । विना सरसल्लाह दलको नेता हटाउने निर्णय गरेकाले किन यस्तो गुर्नुभयो ? उहाँहरूलाई नै थाहा होला ।’
दलको नेताबाट आफूलाई हटाएको पत्रलाई संसद्ले कानुन र विधि अनुसार हेर्ने रञ्जिताको विश्वास छ । उहाँहरूले संसद्मा पत्र पठाउनु भएको भन्ने छ । नियम र कानुन हेरिन्छ होला । नियम कानुन अनुसार दलको नेता चयन हुन्छ, चेन्ज हुन्छ । विधान विपरीत मनपरी ढङ्गले काम गर्ने छुट छैन,’ उनले भनिन् ।
स्वतन्त्र उम्मेदवारी दिएर निर्वाचित लालवीर चौधरीको नाम नाउपाको सांसदको रेकर्डमा नरहेको उनले बताइन् । ‘हाम्रो माननीय लालवीर चौधरी स्वतन्त्रबाट पार्टीमा आउनु भएको छ । मलाई जहाँसम्म लाग्छ । उहाँ नाउपाको सांसद भनेर दर्ता पनि हुनु भएको छैन,’ रञ्जिताले भनिन् ।
