काठमाडौँ । नेपाली कांग्रेसका नेता प्रकाशमान सिंहले विशेष महाधिवेशन आफूहरूको चाहना नभएको भन्दै १४औँ महाधिवेशनबाट आएको नेतृत्वले नै १५औँ महाधिवेशन गर्ने बताएका छन् ।
गणेशमान सिंह स्मृति दिवसको अवसरमा शुक्रबार काठमाडौंको शोभा भगवतीस्थित सिंहको शालिकमा माल्यार्पणपछि सञ्चारकर्मीसँग सिंहले १५औँ महाधिवेशनको तयारीमा आफूहरु अघि बढिसकेको बताए । पार्टीको विधि, विधान र लोकतान्त्रिक मूल्य–मान्यताअनुसार १५औँ महाधिवेशन सम्पन्न गरिने उनको भनाइ छ ।
विशेष महाधिवेशन कसैको व्यक्तिगत महत्वाकांक्षा पूरा गर्न गरिएको भन्दै सिंहले विधि र नियम मिच्नु उचित नहुने धारणा राखे । राजनीतिक दलका लागि राजनीतिक मुद्दा र एजेण्डा मुख्य हुने उनको भनाइ छ ।
