काठमाडौं । वीरगञ्जको नेशनल मेडिकल कलेजमा मेडिकल शिक्षाको गुणस्तर र सञ्चालन प्रक्रियामाथि प्रश्न उठाउँदै प्रतिनिधिसभामा छानबिनको माग गरिएको छ ।
शुक्रबारको प्रतिनिधिसभाको बैठकमा राष्ट्रिय स्वतन्त्र पार्टीका सांसद रहबर अन्सारीले कलेजमा गम्भीर अनियमितता भइरहेको दाबी गर्दै सरकारको ध्यानाकर्षण गराएका हुन् ।
अन्सारीले कलेजले करिब २५ जना ‘नक्कली प्राध्यापक’ देखाएर पोस्ट ग्राजुएट (पीजी) सिट प्राप्त गरेको आरोप लगाए । उनका अनुसार कलेजको गतिविधिबारे प्रश्न उठाउने विद्यार्थीलाई होस्टेलबाट निकालिएको र कलेज प्रवेशमा समेत रोक लगाइएको छ।
चिकित्सा शिक्षा आयोगको निरीक्षणका क्रममा समेत अनियमितता लुकाउने प्रयास हुने गरेको उनको दाबी छ। निरीक्षण टोली आउँदा सुरक्षा गार्डलाई बिरामीका रूपमा बेडमा सुताउने तथा नक्कली प्राध्यापकलाई वास्तविक प्राध्यापकका रूपमा प्रस्तुत गर्ने गरिएको उनले बताए ।
