काठमाडौँ– प्रधान्यायाधीश चोलेन्द्र शमशेर राणाको राजीनामा माग्दै आन्दोलन गरिरहेको नेपाल बार एसोसिएसनले आइतबार सत्तारुढ गठबन्धनको एक दल नेकपा (एकीकृत समाजवादी) लाई ज्ञापनपत्र बुझाएको छ ।
आइतबार नेकपा एसका अध्यक्ष माधवकुमार नेपाललाई बार पदाधिकारीले ज्ञापनपत्र बुझाएका हुन् । ज्ञापनपत्रमा प्रधानन्यायाधीश राणामाथि महाभियोग लगाउनुपर्नेलगायतका मागहरु छन् । ज्ञापनपत्र बुझ्दै अध्यक्ष नेपालले न्यायालय संकटबारे पार्टीमा छलफल गर्ने बताए । उनले सत्ता गठबन्धनमा पनि यो विषयमा छलफल गरिने बताए ।
बारले यसअघि नेपाली कांग्रेस, नेकपा एमाले, नेकपा माओवादी केन्द्र, जसपा, लोसपा, सभामुख अग्नि सापकोटा र राष्ट्रिय सभाका अध्यण गणेश तिम्सिनालाई ज्ञापनपत्र बुझाइसकेको छ । बारले आइतबार चौथो चरणको आन्दोलन सकेको छ । सोमबारदेखि पाँचौ चरणको आन्दोलन गर्ने तयारीमा छ ।
आइतबार पनि बारले सर्वोच्च अदालत परिसरमा धर्ना दिएको थियो । सो धर्नामा बोल्दै सर्वोच्च बारका अध्यक्ष पूर्णमान शाक्यले प्रधान्यायाधीश राणाले पदीय हैसियत गुमाइसकेको टिप्पणी गरेका थिए । राणाबाहेकको बसेको फुलकोर्ट बैठकले गोलाप्रथा लागू गर्ने निर्णय गरेर प्रधान्यायाधीशको अधिकार कटौती गरिसकेको छ ।
