गत असार २८ गते भरतपुर महानगरपालिका–२९ सिमलतालबाट पहिरोसँगै खसेका दुईवटा यात्रु बसको खोजीमा नेपालमा रहेर आठ दिनदेखि खट्टिएका भारतीय टोली त्रिशूलीको धारिलो पानीसँग हार मान्दै रित्तो हात फर्किएको छ ।
सशस्त्र प्रहरी र नेपाली सेनाको गोताखोर टोलीसँगै दुवै बस खोजीमा जुटेको भारतीय टोली ८ दिनको कोसिसमा पनि दुवै बस भेट्टाउन नसकेपछि आइतबार निराश हुँदै फर्किएको हो । उच्च प्रविधियुक्त उक्त भारतीय टोली घटनाको आठौं दिनमा साउन ५ गते घटनास्थल सिमलताल आइपुगेको थियो ।
नेशनल डिजास्टर रेस्पोन्स फोर्स (एनडीआरएफ) को यो टोलीले दुईवटा बससँगै बेपत्ता भएका कोही यात्रुसमेत फेला पार्न सकेन । दुर्घटनापछि त्रिशूलीमा डुबेका करिब ६५ जना यात्रुमध्ये २४ जनाको शव सिमलतालबाट ४० देखि ६० किलोमिटर दक्षिण नारायणी नदी र गण्डक ब्यारेज तथा बिहारको क्षेत्रमा भेटिएका हुन् ।
भारतीय टोली उच्च प्रविधियुक्त भए पनि त्रिशूलीमा आइरहेको निरन्तरको बाढीको उच्च करेन्टका कारण बस ठम्याउन असफल रह्यो । उल्टै शनिबार यो भारतीय टोलीले बसको खोजीमा प्रयोग गरिरहेको १९ केजी तौलको एउटा चुम्बक नै हरायो ।
भारतीय टोलीले ल्याएको उक्त चुम्बकलाई त्रिशूलीले शनिबार बगाएर बेपत्ता बनाएको हो। त्रिशूलीले बगाएको चुम्बक खोज्दै भारतीय टोली देवघाटसम्म पुगे पनि फेला पार्न सकेन । भारतीय टोलीको प्रयास असफल भएर फर्किएपछि अब सशस्त्र प्रहरी र नेपाली सेनासहितले फरक तरिकाले खोजीकार्यलाई निरन्तरता दिने भएका छन् ।
अब सरकारले खोजी पनि निरन्तर गर्दै मृतक र बेपत्ता व्यक्तिका परिवारलाई राहत पनि दिने भएको छ ।
