राष्ट्रिय स्वतन्त्र पार्टी (रास्वपा) का सभापति रवि लामिछाने आगामी जेठ १८ गते भारत भ्रमणमा जाने भएका छन् ।
भारतीय विदेश मन्त्रालयको औपचारिक निमन्त्रणामा हुन लागेको भ्रमण दुई दिनसम्म रहने बताइएको छ । भ्रमणका क्रममा लामिछानेले भारतका उच्चस्तरीय राजनीतिक तथा कूटनीतिक नेतृत्वसँग भेटवार्ता गर्ने कार्यक्रम तय भएको छ ।
उनले भारतीय प्रधानमन्त्री नरेन्द्र मोदी, विदेशमन्त्री एस. जयशंकर, विदेश सचिव विक्रम मिस्री तथा राष्ट्रिय सुरक्षा सल्लाहकार अजित डोभालसँग भेट गर्नेछन् । साथै भारतीय जनता पार्टी (भाजपा) का नेताहरूसँग पनि छलफल हुने जनाइएको छ ।
यो भ्रमणलाई नेपाल–भारत सम्बन्धको वर्तमान सन्दर्भमा अर्थपूर्ण रूपमा हेरिएको छ । पछिल्लो समय लिम्पियाधुरा–लिपुलेक क्षेत्रलगायत सीमा विवाद, दुवै देशका उच्चस्तरीय भ्रमण स्थगित हुनेजस्ता घटनाले सम्बन्धमा केही चिसोपन देखिएको अवस्थामा लामिछानेको भारत भ्रमणलाई महत्त्वपूर्ण कूटनीतिक पहलका रूपमा व्याख्या गरिएको छ ।
यसअघि भारतले नेपालका प्रमुख राजनीतिक दलका शीर्ष नेताहरूलाई यस्तै प्रकारका औपचारिक निमन्त्रणाहरू दिएको थियो ।
