काठमाडौँ । नेपाली कम्युनष्टि पार्टी(नेकपा)का नेता वर्षमान पुनले राष्ट्रिय स्वतन्त्र पार्टी (रास्वपा) लाई थिति बसाउने नाममा चालिने कदमहरू सधैँ विधिसम्मत र संविधानको परिधिभित्र रहेर गर्न आग्रह गरेका छन् ।
आइतबार चितवनको भरतपुरमा रास्वपाको पहिलो महाधिवेशन उद्घाटन समारोहलाई सम्बोधन गर्दै पुनले नयाँ पुस्ताको राजनीतिले जनतामा आशा जगाएको भए पनि पद्धतिभन्दा बाहिर नजान सुझाव दिए ।
उनले नेपाली समाजको रूपान्तरणको यात्रा सहज नभएको र ठूलो बलिदानको जगमा सङ्घीय लोकतान्त्रिक गणतन्त्र स्थापना भएको स्मरण गराए । पुनले रास्वपा र नेकपाबिच पृष्ठभूमि र काम गर्ने शैली फरक भए तापनि सुशासन र समाज रूपान्तरणको एजेन्डामा धेरै समानता रहेको उल्लेख गरे ।
पुनले राष्ट्रिय स्वतन्त्र पार्टी (रास्वपा)ले लिने नीति र महाधिवेशनबाट चयन गर्ने नेतृत्वले पार्टीका लागि मात्र नभएर देशकै लागि महत्त्व राख्ने बताए ।
