काठमाडौं । भूमि व्यवस्था, सहकारी, संघीय मामिला तथा सामान्य प्रशासन मन्त्रालयले विदेशी मुलुकको आवासीय अनुमति(पीआर) लिएर लामो समयदेखि कार्यालयमा अनुपस्थित चार कर्मचारीसँग स्पष्टीकरण माग गरेको छ ।
मन्त्रालयका अनुसार बिदा अवधि सकिएपछि आफ्नो कार्यरत कार्यालयमा हाजिर नभई विदेशमै बसोबास गरिरहेको पाइएपछि उनीहरूमाथि कानुनी प्रक्रिया अघि बढाइएको मन्त्री प्रतिभा रावलले जानकारी दिएकी छन् ।
उनीहरुले अस्थायी आवासीय अनुमति, स्थायी आवासीय अनुमति (पीआर) तथा डाइभर्सिटी भिसा (डीभी) प्राप्त गरेको खुलेको मन्त्रालयले जनाएको छ । मन्त्रालयले निजामती सेवा ऐन, २०४९ अनुसार उनीहरूलाई भविष्यमा सरकारी सेवाका लागि समेत अयोग्य ठहरिने गरी विभागीय कारबाही अघि बढाउनुपर्ने अवस्था देखिएको उल्लेख गरेको छ ।
मन्त्रालयले सम्बन्धित चारै कर्मचारीलाई सूचना प्रकाशित भएको मितिले १५ दिनभित्र चित्तबुझ्दो आधार, कारण र प्रमाणसहित लिखित सफाइ पेश गर्न निर्देशन दिएको छ। तोकिएको अवधिभित्र सफाइ पेश नगरे वा पेश गरिएको स्पष्टीकरण सन्तोषजनक नभए प्रचलित कानुनबमोजिम थप कारबाही प्रक्रिया अघि बढाइने मन्त्रालयले जनाएको छ।
