रोयटर्स । जापानको दक्षिणी शहर कुमामोटो नजिक आएको ७.१ म्याग्निच्युडको शक्तिशाली भूकम्पमा मृत्यु हुनेको संख्या १३ पुगेको छ। भग्नावशेषमा फसेकाहरूको उद्धारका लागि खोज तथा उद्धार अभियान तीव्र पारिएको जापान सरकारले जनाएको छ।
जापानकी प्रधानमन्त्री सानाए ताकाइचीले समयसँगको दौड भइरहेकाले सम्भव भएसम्म धेरै मानिसको ज्यान बचाउन स्थलमा उपलब्ध सबै स्रोत परिचालन गरिएको बताइन्। भूकम्पका कारण हजारौं घरमा विद्युत् आपूर्ति अवरुद्ध भएको छ भने सडकहरूमा समेत ठूलो क्षति पुगेको छ।
बुधबार बिहान उद्धार टोलीले आंशिक रूपमा भत्किएको एक सपिङ मलको भग्नावशेषबाट आठ जनाको सकुशल उद्धार गरेका छन् । भूकम्प आएको करिब एक घण्टापछि मलमा भएको अज्ञात कारणको विस्फोटमा २० वर्ष उमेर समूहका दुई महिलाको मृत्यु भएको छ। स्थानीय सञ्चारमाध्यमका अनुसार ग्यास विस्फोट भएको हुन सक्ने आशंकामा अनुसन्धान भइरहेको छ।
दमकल, प्रहरी र सेनाको संयुक्त टोलीले सहायता मागिएको भवनका भागहरूमा केन्द्रित भएर उद्धार अभियान सञ्चालन गरिरहेको छ। यद्यपि, क्षतिको पूर्ण विवरण अझै खुल्न बाँकी छ। सार्वजनिक प्रसारक एनएचकेका अनुसार सपिङ मलका २० देखि ३० जना कर्मचारी अझै सम्पर्कविहीन छन्। यस्तै, निप्पोन पेपर इन्डस्ट्रिजको एक कारखानामा चिम्नी भत्किँदा सात जना बेपत्ता भएका छन् भने चार जना गम्भीर घाइते भएका छन्। अस्पतालहरूमा दर्जनौं घाइतेको उपचार भइरहेको छ।
अधिकारीहरूका अनुसार कुमामोटो प्रिफेक्चरमा करिब दुई लाख ६० हजार जनालाई सुरक्षित स्थानमा सारिएको छ। भूकम्पको केन्द्रबिन्दु कुमामोटो शहरबाट करिब २० किलोमिटर दक्षिणमा रहेको बताइएको छ। अधिकारीहरूले प्रभावित क्षेत्रमा आगामी करिब एक सातासम्म शक्तिशाली परकम्प आउन सक्ने चेतावनी दिँदै पहिरोको जोखिमप्रति पनि सतर्क रहन आग्रह गरेका छन्।
हालसम्म ३६ हजारभन्दा बढी घरमा विद्युत् आपूर्ति पुनःस्थापित हुन सकेको छैन। तापक्रम ३४ डिग्री सेल्सियससम्म पुग्ने अनुमान गरिएकाले गर्मीका कारण स्वास्थ्य समस्या बढ्न सक्ने भन्दै अधिकारीहरूले चिन्ता व्यक्त गरेका छन्।
