नेकपा माओवादी केन्द्रका अध्यक्ष पुष्पकमल दाहाल प्रचण्डले नेकपा एमालेले तेस्रो पटक संसद विघटनको प्रयास गरिरहेको आरोप लगाएका छन् । राजधानीमा सम्पादकहरुसँगको अन्तरक्रियाका क्रममा अध्यक्ष प्रचण्डले यस्तो आरोप लगाएका हुन् । अहिले संसदको प्रमुख प्रतिपक्षी दल एमालेले तेस्रो पटक संसद विघटन गर्न खोजिरहेको उल्लेख गर्दै प्रचण्डले कुनै पनि हालतमा विघटन हुन नदिने बताए ।
उनले भने-‘एमाले अध्यक्ष ओलीले तेस्रो पटक संसद विघटन गर्न खोजिरहेका छन् । पहिलो पटकको विघटन सडकबाट बदर गर्यौँ । दोस्रो पटकको विघटन अदालतबाट बदर गर्यौँ । तेस्रो पटक पनि प्रयास भइरहेको छ । हामी हुन दिन्नौँ ।’ उनले एमाले अध्यक्ष केपी शर्मा ओली सर्वदलीय बैठकमा नआएपनि उनलाई मनाउन बालकोट नै जान आफूले देउवालाई भनेको बताए ।
उनले भने – ‘ओली सर्वदलीय बैठकमा आउँदैनन् । बरु प्रधानमन्त्रीलाई तपाई र म बालकोट जाम भनेर मैले प्रधानमन्त्रीलाई भनेको छु । मैले एमसीसीका बारेमा सबै पार्टीसँग छलफल हुनुपर्छ भनेर बैठक गर्दा पनि ओली आउँदैनन् । उनी तेस्रो पटक संसद विघटन गराउन चाहान्छन् ।’
