नेताहरुको कार्यविभाजन टुंगो लगाउन नेकपा एमाले स्थायी कमिटीको बैठक आज बस्ने भएको छ । विधान महाधिवेशनका प्रस्तावहरुमाथि छलफल गर्न बैठक बोलाइएको केन्द्रीय कार्यालय सचिव शेरवहादुर तामाङले जानकारी दिए ।
एमालेको विधान महाविधेशन असोज १५ देखि १७ सम्म काठमाडौंमा हुँदैछ । यसअघि बसेको बैठकले प्रतिनिधिको मापदण्ड तय गरेको थियो । आजको बैठकमा विधान मस्यौदा तथा विधान महाधिवेशनमा प्रस्तुत हुने प्रस्तावमाथि छलफल हुने बताइएको छ ।
यसका साथै १० बुँदे सहमति अनुसार नेताहरुको कार्यविभाजनको विषयमा पनि छलफल हुने एमाले स्रोतले जनाएको छ । प्रदेश इन्चार्जहरुको बारेमा अझै अस्पष्टता रहेकाले नेताहरुको कार्य विभाजनपछिमात्र टुंगो लाग्नेछ ।
यसअघि बागमती प्रदेश र सुदुरपश्चिम प्रदेशको इन्चार्जबाट क्रमशः अष्टलक्ष्मी शाक्य र भीम रावललाई हटाइएकोमा मध्यमार्गी नेताहरु असन्तुष्ट रहँदै आएका छन् ।
