लुम्बिनी प्रदेशकी स्वास्थ्य राज्यमन्त्री विमला खत्री ओलीले एकजना महिलालाई घरमै गएर कुटपिट गरेको भन्दै उनी प्रहरी नियन्त्रणमा परेपछि यतिबेला यो विषयले राजनीतिक वृत्त तरंगित भएको छ ।
विवादास्पद छबीकी मन्त्री ओलीले ती महिलालाई किन कुटपिट गरेकी हुन् भन्ने कारण खुलिनसकेपनि मन्त्री ओली ती महिलाका श्रीमानसँग प्रेम सम्बन्धमा रहेको भन्दै केही अनलाइनले समाचार लेखेका छन् । अघिल्लो वर्ष मात्रै सांसद रहेका बेला विमला माओवादी केन्द्रका एक स्थानीय नेतासँग प्रेम सम्बन्धमा रहेको चर्चा चलेको थियो । त्यतिबेला एउटा तस्बीर समेत भाइरल भएको थियो, जहाँ तत्कालिन सांसद र अहिलेकी मन्त्री विमलाले ती नेतालाई चुम्बन गरेकी छिन् । तर, चुम्बन गरेको देखिने सो तस्बीर वास्तविक नभई फोटोसपबाट बनाइएको त्यतिबेला उनको दाबी थियो ।
सोमबार आफ्ना पिएसओ सहित आफ्नो घरमा छिरेकी मन्त्री ओलीले मेरो एकराज खोई भन्दै आफूमाथि कुटपिट गरेको ती महिलाले स्थानीय सञ्चार माध्यमहरुलाई बताएकी छिन् । मन्त्रीको कुटपिटबाट आफू र आफ्नी ६ वर्षकी छोरी घाइते भएको ती महिलाको भनाई छ ।
नेकपा एमालेबाट प्रदेशसभा सदस्य बनेकी विमला खत्री ओली तत्कालिन अवस्थामा नेकपामा विग्रह आएसँगै माओवादी प्रवेश गरेकी थिइन् । अघिल्लो वर्ष विमलाकै कारण शंकर पोखरेल नेतृत्वको लुम्बिनी सरकार ढल्ने अवस्थामा पुगेको थियो । त्यतिबेला मुख्यमन्त्री शंकर पोखरेलले पार्टी परिवर्तन नगर्न दबाब दिँदै आफूलाई घन्टौंसम्म मुख्यमन्त्रीको क्वार्टरमा बन्धक बनाइएको उनले आरोप लगाएकी थिइन् । उनको आरोपले केहीदिन राजनीतिक वृत्त तातेपनि त्यतिकै सेलाएको थियो ।
एमालेबाट चुनाव जितेर माओवादी बनेपछि उनलाई माओवादी कोटाबाट मन्त्री बनाइएको थियो ।
उनका पति समेत रहेका तत्कालिन प्रदेशसभाका सदस्य उत्तर कुमार ओलीको सडक दुर्घनामा परेर निधन भएपछि उनलाई एमालेले त्यतिबेला सांसद बनाएको थियोे ।
