काठमाडौंको तीनकुनेमा गएराती भएको सामुहिक हत्या प्रकरणमा प्रहरी नियन्त्रणमा रहेका एक व्यक्ति आफैं ट्याक्सी चढेर प्रहरी चौकी पुगेको बुझिएको छ । धारिलो हतियार प्रयोग गरी ४ जनाको सामुहिक हत्या भएको केही समयपछि शरीरमा रगत लतपतिएको अवस्थामा एक व्यक्ति आफैंले ट्याक्सी रोकेर प्रहरी चौकी पुगेको बुझिएको हो ।
दोलखाका बालकृष्ण शिवाकोटीले सञ्चालन गर्दै आएको तिनकुनेस्थित दिव्य समिलको हाताभित्र गएराती ४ जनाको हत्या भएको थियो । हत्या भएका मध्ये तीन जना एकै परिवारका सदस्य हुन् भने अर्का एक जना मोरङका हुन् । उपत्यका प्रहरी कार्यालय रानीपोखरीका अनुसार घटनामा मिलमा गेट पालेका रुपमा काम गर्दै आएका कुमार भुजेल, उनकी श्रीमती अम्बिका भुजेल, आमा ७६ वर्षिया शुभद्रा भुजेल र मोरङका नविन राईको मृत्यु भएको छ । घटनालगत्तै एक जना व्यक्ति आफैं ट्याक्सी चढेर तीनकुनेस्थित प्रहरी वृत्त नयाँबानेश्वर पुगेका थिए । उनी २८ वर्षिय दीपेन्द्र राई रहेको प्रहरीले जानकारी दिएको छ ।
प्रहरी स्रोतका अनुसार लुगा र जुत्तामा रगतैरगत भएको अवस्थामा उनी प्रहरी चौकी पुगेका थिए । घटनास्थलबाट हडबडाउँदै सडकमा निस्किएका राईले ट्याक्सी भेटेपछि तीनकुनेको प्रहरी चौकीमा र्पुयाइदिन भनेका थिए । यसैबीच प्रहरीले राईलाई र्पुयाउने ट्याक्सी चालकसँग पनि सोधपुछ गरेको छ । ट्याक्सी चालकले ती व्यक्ति रगत लतपतिएका कपडासहित आफ्नो टयाक्सीमा आएको प्रहरीलाई बताएका छन् ।
