संयुक्त राष्ट्रसंघका महासचिव एन्टोनियो गुटेरेसले संघीय संसद्का दुवै सदनको संयुक्त बैठकलाई कात्तिक १४ गते सम्बोधन गर्ने भएका छन् । कात्तिक १२ देखि १५ गतेसम्म नेपालको औपचारिक भ्रमण गर्न लागेका गुटेरेसले प्रतिनिधिसभा र राष्ट्रिय सभाको संयुक्त बैठकलाई सम्बोधन गर्ने भएका हुन् । मन्त्रिपरिषद बैंठकले गुटेरेसको नेपाल भ्रमण स्वीकृत गरेसँगै संघीय संसद्मा सम्बोधनको कार्यक्रम तय भएको हो ।
संघीय संसद् सचिवालयका अधिकारीले दिएको जानकारी अनुसार महासचिव गुटेरेसले संघीय संसद्को संयुक्त बैठकलाई कात्तिक १४ गते अपराह्न ४ बजे सम्बोधन गर्नेछन् । प्रधानमन्त्री पुष्पकमल दाहालले असोज पहिलो साता संयुक्त राष्ट्रसंघको ७८ औं महासभामा भाग लिने क्रममा गुटेरेसलाई नेपाल भ्रमणको निम्ता दिएका थिए ।
भारतका प्रधानमन्त्री नरेन्द्र मोदीले सम्बोधन गरेयता संघीय संसदलाई अन्य विदेशी उच्चपदस्थ व्यक्तिले सम्बोधन गरेका छैनन् । भारतीय प्रधानमन्त्री नरेन्द्र मोदीले केही वर्षअघि नेपालको संसदलाई सम्बोधन गरेका थिए ।
