ग्राहकलाई बासी खाना तथा सडेगलेको दूषित खाना बिक्री गर्ने धादिङको थाक्रे गाउँपालिका–८ चारकिलोमा रहेको न्यू रीया होटललाई दुई लाख रुपैयाँ जरिवाना गराइएको छ ।
खाजा तथा खाना खान होटल पुगेका ग्राहकले खाना बासी, गन्हाएको र दूषित रहेको भनेपछि होटल सञ्चालकले ती ग्राहकलाई गालीगलौजसमेत गरेको गुनासो छ । उपभोक्ता संरक्षण ऐन, २०७५ बमोजिम रिया होटललाई जरिवाना गरिएको जिल्ला अनुगमन समिति धादिङले जनाएको छ ।
जिल्ला अनुगमन समितिका अनुसार आइतवार बिहान एकजना उपभोक्ताले प्रमुख जिल्ला अधिकारीलाई टेलिफोन गरेर होटलले बासी, सडेगलेको खानेकुरा बिक्री गरिरहेको गुनासो गरेका थिए । त्यसलगत्तै जिल्ला प्रहरी कार्यालय धादिङमार्फत प्रहरी कार्यालय खानीखोलाबाट प्रहरी टोली होटलमा पुगेको थियो ।
अनुगमनमासमेत कैफियत भेटिएको हो । होटलका सञ्चालक नुवाकोट शिवपुरी गाउँपालिका–८ का ३९ वर्षीय राजेश पाठकलाई पक्राउ गरिएको थियो । जिल्ला बजार अनुगमन समिति धादिङका सदस्यसचिव एवम् उद्योग तथा वाणिज्य कार्यालय धादिङका प्रमुख मेगराज गौतमका अनुसार एक हप्ताभित्र तोकिएको जरिवाना तिर्ने गरी छाडिएको छ ।
जिल्ला प्रशासन कार्यालय, उद्योग तथा वाणिज्य कार्यालयसहित नियामक निकायले पछिल्लो समय होटल तथा पसलको अनुगमनमा कडाइ गरेको छ । यसअघि पनि तोकिएको मूल्यभन्दा बढी लिने होटल तथा पसललाई कालोबजारी गरेको कसुरमा रु एक लाखसम्म जरिवाना तिराइएको थियो ।
