बाग्लुङको बडीगाड गाउँपालिका–१० आरुपाटामा लगातार परेको पानीसँगै झरेको पहिरोले घरगोठ बगाउँदा हिजो गम्भीर घाइते भएका तीन जनालाई आज थप उपचारका लागि काठमाण्डौ ल्याइएको छ । घाइतेहरू ३१ वर्षीया सीता थापा, १९ वर्षीया रिमा पुन र ४६ वर्षीया संगीता बुढालाई उपचारका लागि काठमाण्डौ ल्याइएको हो ।
प्रतिकूल मौसमका कारण हिजो उनीहरूलाई उपचारका लागि अन्त लैजान सक्ने अवस्था नभएपछि आज नेपाली सेनाको हेलिकप्टरबाट काठमाण्डौ ल्याएर त्रिवि शिक्षण अस्पताल महाराजगञ्जमा उपचार भइरहेको छ । हिजो बडीगाड–१० आरुपाटामा घरमा पहिरो खस्दा ६ जनाले ज्यान गुमाएका थिए ।
त्यस्तै बडीगाड–९ मा दुई जना गरी ८ जनाको ज्यान गएको थियो । पहिरोमा ९ जना घाइते भएका छन् । घाइतेमध्ये अरूलाई थप उपचारका लागि बुर्तिबाङ अस्पताल लगिएको जिल्ला प्रहरी कार्यालय बाग्लुङले जनाएको छ । त्यस्तै ओमप्रसाद पुन, सिर्जना विक, मंगलसेन बुढा, सुमित्रा विक, सशीराम विक र ज्ञाने बुढाको बुर्तिबाङमा उपचार भइरहेको छ ।
पहिरोमा हराइरहेका चार जनाको खोजी भइरहेको छ । पहिरोका कारण झन्डै ५० घरधुरी विस्थापित भएका छन् ।
उनीहरूलाई पनि खाने, बस्ने र सुरक्षित पानीको अभाव भएको जनाइएको छ ।
