बोलेरो गाडी भासिएकै ठाउँमा लापत्ता भएका थिए चर्दै गरेका आठ हल गोरु, तीनदिन बित्दासमेत गाडी भेटाउन सकिएन । यतिबेला मकवानपुरको हेटौंडा उपमहानगरपालिकाको वडा नम्बर १६ र १७ जोडिएको गैरीगाउँको भित्री कच्ची सडकमा गुडिरहेको गाडी भासिएर जमिनमुनि हराएको घटनाले धेरैको ध्यान तानेको छ ।
गुडिरहेको बोलेरो गाडी शुक्रबार दिउँसो भासिएको हो । उक्त गाडी अहिलेसम्म पनि भेटिएको छैन । अग्रज स्थानियहरुका अनुसार गाडी भासिएको ठाउँमा लामो समय अगाडी आठ हल गोरु चर्दाचर्दै लापता भएका थिए । अहिले घाँस काट्ने मेसिन बोकेको स्थानीय हरिराम राईको ना ४ च ४८३३ नम्बरको सिंगल क्याब पिकअप गाडी भासिएको हो ।
शुक्रबार दिउँसो भासिएको गाडी शुक्रबार शनिबार दिनभर स्थानिय र नेपाल प्रहरीले खोजेका थिए । फेला पार्न नसकिएपछि आज आइतबार सशस्त्र प्रहरीको टोलीलाई बोलाएर गाडी खोज्ने काम भइरहेको छ ।
गाडी धसिँदै जान थालेपछि सहचालक र चालकले गाडीलाई पछाडिबाट डोरीले बाँधेर तान्ने प्रयास गरे । तर सकेनन् । सामाजिक सञ्जालमा भाइरल भइरहेको एउटा भिडियोमा उनीहरुले टेलिफोन गरेर गाडी धसिएको जानकारी कसैलाई गराउँछन् ।
अर्कोतर्फबाट बोल्ने व्यक्तिले ट्याक्टर लगाएर तान्न सुझाव दिन्छन् । तर उनले गाडी पुरै जमिनमुनि डुबिसेकेकाले ट्याक्टर लगाएर तान्न सम्भव नहुने बताउँछन् । गाडी भासिएको त्यो ठाउँमा अहिले ठूलो खाल्डो परेको छ र त्यो खाल्डो धमिलो पानीले भरिएको छ
गाडी भासिएको सडकको दायाँ–बायाँ माछापालन पोखरी छन् । त्यो सडककै छेउँमा पानी तान्ने बोरिङ गाडिएको छ । उक्त बोरिङ गाडी धनी हरिराम राईले माछापोखरीमा पानी हाल्ने प्रयोजनका लागि गाडेका थिए । त्यही बोरिङसँगै सडक भासिएर गाडी हराएको हो । स्थानीयहरुका अनुसार अहिले बाटो बनेको र दायाँबायाँ पोखरी बनेको ठाउँ पहिले दलदल थियो ।
त्यो दलदलमा स्थानीयका हल गोरु हराउने घटना पनि भएका थिए । जमिन भासिएको ठाउँमा निकै पहिले ७–८ हल गोरु धसिएको त्यहाँका अग्रज स्थानियहरु बताउँछन् । केही वर्षयता भने जमिन सुक्खा भएर साह्रो भएको थियो ।
त्यसैले त्यहाँ बाटो बनाइएको थियो । माटो सुकेर सुख्खा भएका कारण बाटो बनाइएको र अहिले फेरि दलदल भएर गाडी भासिएको स्थानियहरु बताउँछन् ।
