जेनजी आन्दोलनमा भएको दमनका सन्दर्भमा जाँचबुझ गर्न बनेको आयोगले पूर्वप्रधानमन्त्री केपी शर्मा ओलीसँग बयान लिने तयारी गरेको छ । फिल्डमा खटिएका सुरक्षाकर्मीसँग बयान लिइसकेको आयोगले नीतिगत तहमा रहेका व्यक्तिहरुसँग बयान लिने तयारी गरेको हो ।
जाँचबुझका लागि ३ महिनाको समय पाएको आयोगसँग अब धेरै दिन बाँकी छैन । अन्य सबैसँग बयान लिइसकेपछि उनीहरुको बयानका आधारमा तत्कालिन प्रधानमन्त्री केपी शर्मा ओली र ओली सरकारका गृहमन्त्री रमेश लेखकसँग बयान लिने आयोगको योजना थियो ।
सोही योजना अनुसार अब ओली र लेखक बयानको सूचीमा छन् । तर, ओलीले भने आफू बयान दिन नजाने बताउँदै आएका छन् । उनी बयानका लागि नगए कानुन अनुसार अघि बढ्ने गृहमन्त्री ओमप्रकाश अर्यालले यसअघि नै चेतावनी दिइसकेका छन् ।
