साढे तीन दिन हिँडेर जनगणना गर्ने टोली दार्चुलाको छाङ्गरू पुगेको छ। भारतले सडक मार्गबाट जान पास नदिएपछि जनगणना कार्यालय दार्चुलाका प्रमुख पदमराज पाण्डेका अनुसार सहायक जनगणना अधिकारी खगेन्द्र कार्की र कार्यालय सहयोगी लोकेन्द्र टेरको टोली हिड्दै सोमबार दिउँसो बाह्र बजेतिर ब्यास गाउँपालिका-१ छाङ्गरू पुगेका छन्। उनीहरू शुक्रबार बिहान दार्चुला सदरमुकामबाट हिँडेका थिए।
छाङ्गरूबाट तिंकर पुग्न चार-पाँच घन्टा हिँड्नुपर्छ। स्थानीय तथा व्यास गाउँपालिका-१ का वडा सचिव विनोदसिंह बुढाथोकीले तिंकरका बासिन्दा आइतबार नै बेंसी झरिसकेको जानकारी दिएका छन्।
जनगणनाको विवरण संकलन गर्नुपर्ने अन्तिम मिति मंसिर ९ लाई तोकिएको छ। भारतीय सडक हुँदै सीतापुलसम्म गाडीमा गएर त्यहाँबाट २०-२५ मिनेट हिँडेर पुगिने छाङ्गरू जान भारतले पास नदिँदा गणकले झन्डै चार दिन हिँड्नु परेको हो।
