साझा उम्मेदवार तय गर्न पौडेल निवासमा संस्थापनइतरका चार नेताको छलफल कांग्रेसको संस्थापनइतर समूहका चार प्रभावशाली नेताहरू १४ औं महाधिवेशनमा साझा उम्मेदवार चयन गर्नका लागि छलफलमा जुटेका छन् ।
कांग्रेसका वरिष्ठ नेता रामचन्द्र पौडेलको निवास बोहोराटारमा सभापतिका आकांक्षीहरू छलफलमा जुटेका हुन् । छलफलमा वरिष्ठ नेता पौडेल, महामन्त्री शशांक कोइराला, केन्द्रीय सदस्यद्वय शेखर कोइराला र प्रकाशमान सिंह छलफलमा रहेको पौडेल सचिवालयले बताएको छ ।
चारै जना नेताहरूले संस्थापनइतर समूहबाट साझा उम्मेदवार तय गर्ने दाबी गर्दै आए पनि सहमति जुट्न सकेको छैन । शेखर र शशांक कोइरालाले एक आपसमा सहमति गर्दा ‘ब्याक’ हुने तयारीमा रहेका पौडेल पुनः सभापतिमा उम्मेदवारीको दाबी गर्न थालेका छन् ।
शेखर र शशांकले कात्तिक अन्तिममा लगभग सहमति गरेको भए पनि संस्थापन खेमाले शशांकलाई सहमतिबाट ‘ब्याक’ गराउन सफल भएको थियो । सभापतिमा उम्मेदवारी दिने दाबी गरिरहेका प्रकाशमान सिंहले रामशाहपथमा प्रचार कार्यालय खोलेर आफ्नो उम्मेदवारीको प्रचारप्रसार थालेका छन् ।
