काभ्रेको बनेपा चारदोबाटोमा स्व.राजा त्रिभुवन शाहको शालिक पुनर्निमाण गर्नुपर्ने भन्दै नेपाल नागरिक अभियान सहित काभ्रेका विभिन्न सामाजिक अभियन्ताहरुले बनेपाका नगर प्रमुखलाई ज्ञापनपत्र बुझाएका छन् ।
काभ्रे क्षेत्र नं २ बाट प्रतिनिधिसभाको चुनावमा स्वतन्त्र उम्मेदवारी दिने घोषणा गरेका श्रीकृष्ण श्रेष्ठको नेतृत्वमा गएका अभियन्ताहरुले नगरप्रमुख शान्तिरत्न शाक्यलाई सोमबार ज्ञापनपत्र बुझाएका हुन् । ज्ञापनपत्र बुझ्दै शाक्यले छिट्टै नगरपालिकाको बैठक बसी शालिक निर्माणका विषयमा छलफल गर्ने प्रतिबद्धता जनाएको स्वतन्त्र उम्मेदवार श्रीकृष्ण श्रेष्ठले जानकारी दिएका छन् ।
गणतन्त्र स्थापनापछि बनेपाका ऐतिहासिक स्थल तथा क्षेत्रको संरक्षण हुन नसकेको भन्दै अभियन्ताहरु लामो समयदेखि आन्दोलनमा छन् । राष्ट्रिय एकताका प्रतिक राजा र राजसंस्थाको महत्व अहिलेका शासकहरुले नबुझेको भन्दै उनीहरुले अहिलेको व्यवस्थालाई जनविरोधी व्यवस्था भनी टिप्पणी समेत गरेका छन् ।
