घण्टौंको लोडसेडिङ हटाएर वाहवाही कमाएका नेपाल विद्युत प्राधिकरणका निर्देशक कुलमान घिसिङ पछिल्ला दिनमा जताततै झ्याप्प झ्याप्प बत्ति जान थालेपछि मजाकको पात्र बन्न थालेका छन् । आजकाल बत्ति जाँदा बत्ति गयो होइन कुलमानलाई के भयो भन्न थालिएको छ । बत्ति गएपनि कुलमान बत्ति आएपनि कुलमान । झ्याप्प गएको बत्ति आयो भने बत्ति आयो होइन कुलमान आयो भन्छन् मान्छेहरु । कुलमान र बत्ति अहिले एक अर्काका पर्याय बनेका छन् । अब कुरा गरौं कुलमानकै पत्रकार सम्मेलनमा बत्ति गएको र त्यो मजाकको विषय बनेको सम्बन्धि प्रसंगको ।
बिहिबार नेपाल विद्युत प्राधिकरणको केन्द्रीय कार्यालयमा कुलमान घिसिङले पत्रकार सम्मेलनको आयोजना गरेका थिए । नेपाल विद्युत प्राधिकारणले गरेका प्रगतिको विवरण सार्वजनिक गर्न घिसिङले प्राधिकरणको केन्द्रीय कार्यालयमा बिहिबार दिउँसो पत्रकारहरु बोलाएका थिए । भनेकै समय अर्थात २ बजे पत्रकारहरु पत्रकार सम्मेलन स्थलमा पुगेपनि । कुलमान घिसिङ सामान्य व्यक्ति मात्रै होइनन् उनी सेलिब्रेटी निर्देशक पनि हुन् । उनले बोलेका कुरा धेरैका लागि चासोका विषय बन्छ भनेर पत्रकारहरु पनि अन्यत्रका कार्यक्रम छाडेरै भएपनि उक्त कार्यक्रममा पुगे । पत्रकार सम्मेलन स्थल खचाखच भयो । कुलमान घिसिङ आफ्ना सहयात्रीहरुलाई दायाँबायाँ राखेर पत्रकार सम्मेलन गर्न थाले । विद्युत प्राधिकरणले के के प्रगति गरयो भनेर उनी त्यसको जानकारी गराउँन थाले । तर, पत्रकार सम्मेलन शुरु भएको केही समयमा नै कुलमान घिसिङले बोल्दा बोल्दै झ्याप्प बत्ति गयो । शान्त रुपमा घिसिङले बोलेका कुरा नोट गर्दै गरेका पत्रकारहरुको आवाज बत्ति गएपछि एकाएक ठूलो भयो । माहुरी भुनभुनाए झैं पत्रकारहरु गुनगुनाउँन थाले ।
कुलमान सरकै अफिसमा त बत्तिको हालत यस्तो छ भने अन्यत्रको के होला भनेर एकजनाले पछाडिाट फ्याट्ट भने । उनको बोली टुंगिसक्दा नसक्दै बत्ति आयो । मञ्चमा रहेका कुलमान घिसिङले हाँस्दै भने : पत्रकार मित्र आइहाल्यो त बत्ति । के साह्रो आत्तिनुभएको । त्यतिकैमा अर्का एकजना पत्रकारले जिस्कँदै भने, बत्ति गएपछि डरलाग्दो अँध्यारो भयो भित्र अनि नआत्तिएर के गर्नु त ? यत्तिकैमा पत्रकार सम्मेलन फेरि शुरु भयो । कुलमान घिसिङले बोल्न थाले । नेपाल विद्युत प्राधिकरणले गरेको प्रगतिको विवरण पत्रकारहरुलाई सुनाउँन थाले । घिसिङले लिखित मन्तव्य सुनाउँन शुरु गरेको केही मिनेट मात्र के भएको थियो फेरि बत्ति झ्याप्प गयो । घिसिङले बोल्दै गरेको माइकको आवाज रोकियो । फेरि झ्याप्प बत्ति गएपछि हलमा हाँसो गुञ्जियो । कुलमानले शान्त हुन आग्रह गर्दै पत्रकारहरुलाई भने, एकैछिन धैर्य गरौं है । त्यत्तिकैमा पत्रकारदिर्घाबाट कुलमानलाई भनियो, बत्ति नभएपनि सरको आवाज हामी सुनिहाल्छौं कन्टिन्यू गरौं । तर, भिडियो खिचिरहेका पत्रकारहरुले भने अनि क्यामेरालाई लाइट चाहिँ के मोबाइल बाल्नू । केहीबेर यस्तै सवाल जवाफ भइरहयो । कुलमानसँगै बसेका प्राधिकरणका अधिकारीहरु पनि मुखामुख गर्न थाले । हलमा हाँसोको फोहोरा छुटिरहयो । बीचमा कसैले भन्यो ः अब मैनबत्ति बालौं । अर्कोले भन्यो होइन, सबैले आ आफ्नो मोबाइलको लाइट बालौं । बत्ति केहीबेरसम्म पनि नआएपछि फेरि अर्का एक पत्रकारले कुलमान घिसिङलाई सोधे, यो बत्ति चाहिँ किन यसरी झ्याप्प झ्याप्प जान्छ निर्देशकज्यू ? मुसुमुसु हाँस्दै कुलमानले भने, यो विषयमा अहिले पछि कुरा गरौंला । उनले यसो भनेको केही मिनेटमा बत्ति आयो ।
कुलमान घिसिङ बोल्न थाले । लिखिति मन्तव्य अघि बढाए । लिखित मन्तव्य सकिने सकिने बेला भएको थियो फेरि बत्ति झ्याप्पै गयो । कुलमान घिसिङले बोल्न थालेपछि बत्ति गएको यो तेस्रोपटक थियो । फेरि बत्ति गएपछि चाहिँ पत्रकारहरुले भने ः कुलमान सर अब बत्ति जुन दिन जाँदैन त्यही दिन हामीलाई बोलाउँनूस् हामी त्यहीदिन आउँछौं , आजलाई पत्रकार सम्मेलन यत्ति गरौं । पत्रकारहरुले यसो भन्दा कुलमानले भने : होइन के भएको छ आज , यस्तो त हुनुनपर्ने । उनले कहिँ कतै फोन घुमाए । फोन घुमाउँदा घुमाउँदै बत्ति पिलिक्क आयो र फेरि झ्याप्पै गयो । कुलमान के गर्ने के को स्थितीमा पुगे । फेरि पत्रकारले भने, यो त अत्ति भयो । त्यस्तो भन्दा नभन्दै बत्ति आयो । कुलमानले फेरि प्रगति विवरण पढ्न थाले । प्रगति विवरण पढिसकेपछि उनले पत्रकारहरुलाई केही प्रश्न भए राख्न अनुमति दिए । पत्रकारले उही पुरानो प्रश्न दोहो¥याए ः किन बत्ति झ्याप्प झ्याप्प गएको ?
कुलमानले बत्ति जानुको मुख्य कारण सुनाए । वर्षा याममा रुखका पात झरेर विद्युत प्रसारण लाइनमा पर्ने र त्यसले विद्युत प्रसारणमा अबरोध हुँदा बत्ति जाने गरेको बताए । कतिपय ठाउँमा ठूला ठूला रुखमुनी प्रसारण लाइन रहेको र सबै ठाउँमा रुखका हाँगा काट्न सम्भव नहुने हुँदा त्यसका पात झरेर बेला बखत बत्ति जाने गरेको उनले जानकारी दिए । उनले यसो भनिरहँदा केही पत्रकारहरुले खासखुस गर्दै भने : निर्देशकको कुरा पत्याइदिउँ ?
तर, निर्देशकको कुरा पत्याएपनि नपत्याएपनि आजकाल झ्याप्प झ्याप्प बत्ति जाने गरेको कुरा भने सत्य हो । जसको प्रत्यक्ष अनुभव स्वयं विद्युत प्राधिकरणका निर्देशक कुलमान घिसिङले नै बिहिबार लिइहाले । त्यसैले झ्याप्प झ्याप्प बत्ति जाने रोगको निदान कसरी गर्ने भन्ने विषयमा कुलमान घिसिङले विशेष रुपमा सोच्न भने आवश्यक छ ।
