मकवानपुरमा मोटरसाइकलको ठक्करबाट पिटीमा रहेका एक प्रहरी जवानको मृत्यु भएको छ । अरु तीन जना घाइते भएका छन् ।
आज बिहान हेटौँडा उपमहानगरपालिका वडा नम्बर–११ थानाभर्याङमा नवलपुर जाँदै गरेको ना ४३ प २२२ नम्बरको मोटरसाइकलले ठक्कर दिदा २५ वर्षीय प्रहरी जवान विनोद एडीको मृत्यु भएको जिल्ला प्रहरी कार्यलय मकवानपुरले जनाएको छ । उनी डडेलधुरा आलिताल गाउँपालिका–६ घर भइ बाग्मती प्रदेश प्रहरी गण हेटौँडामा कार्यरत रहेका थिए।
घाइते एडीलाई उपचारका लागि हेटौँडा अस्पताल लगिएकोमा डाक्टरले मृत घोषणा गरेका थिए । चालक लक्ष्मण लामा घाइते भएका छन् । हेठौंडा अस्पतालमा सामान्य उपचार पछि थप उपचारका लागि उनलाई चितवन पठाएको प्रहरीले जनाएको छ । अन्य दुईजना प्रहरी जवान नवराज सार्की र विजय खत्री सामान्य घाइते भएका प्रहरीले जनाएको छ ।
