अमेरिका लैजाने भन्दै काठमाडौंमा ल्याएर बन्धक बनाइएका ११ जना भारतीय नागरिकलाई काठमाडौं प्रहरी टोलीले उद्धार गरेको छ ।
काठमाडौं परिसरबाट खटिएको प्रहरीको विशेष टोलीले उनीहरूलाई गए राति काठमाडौँको रातोपुल क्षेत्रबाट उद्धार गरेको जिल्ला प्रहरी परिसर काठमाडौंले जनाएको छ । करिब एक महिनाभन्दा बढी समयदेखि भारतीय नागरिकहरुलाई राजधानीको रातोपुलस्थित एक घरमा बन्धक बनाएर राखेको भन्ने विशेष सूचनाको आधारमा प्रहरीले बुधबार खानतलासी गर्दा ११ जना भारतीय नागरिक रहेको खुलेको हो ।
यस्तै बन्धक बनाउने कार्यमा संलग्न ७ जना पनि पक्राउ परेका छन् । पीडितहरुले एजेन्टलाई ४५ लाखसम्म बुझाएको प्रारम्भिक अनुसन्धानबाट खुलेको जिल्ला प्रहरी परिसर काठमाडौँका एक अधिकारीले जानकारी दिए । ती अधिकारीका अनुसार नेपाल ट्रान्जिट बनाएर दलालहरुले उनीहरुलाई अमेरिका लैजाने प्रयास गरेको खुलेको छ । उद्धार भएका पीडितहरु पन्जाव, हरिणानालगायतका स्थानको भएको बताइएको छ भने सबै पुरुष हुन् ।
विस्तृत विवरण आज सार्वजनिक गरिने प्रहरीले जनाएको छ ।
