Logo
२०८१, ३ फाल्गुन शनिबार
|  Sat Feb 15 2025

रविलामिछाने माथि थप अनुसन्धान गर्नुपर्ने भन्दै म्याद थप्न अदालत उपस्थित गराइयो


सहकारी संस्थाको रकम हिनामिना प्रकरणमा पक्राउ परेका रास्वपा सभापति रवि लामिछानेलाई १३ दिन म्याद थपको माग गर्दै प्रहरीले जिल्ला अदालत कास्कीमा उपस्थित गराएको छ । उनी माथिको अनुसन्धान अझै नसकिएको भन्दै जिल्ला प्रहरी कार्यालय कास्कीले आज म्याद थपका लागि पुनः अदालत उपस्थित गराएको हो ।

गत कात्तिक २ गते काठमाडौंबाट पक्राउ परेका लामिछानेलाई सोही दिन कास्की लगिएको थियो । त्यसपछि रुपन्देही र काठमाडौंमा बयान सकेर उनलाई गत मंगलबार चितवन समेत लगेर बयान लिइएको थियो । सुरुमा उनीमाथि सहकारी ठगी र संगठित अपराधमा अनुसन्धान थालिएको थियो ।

पछि कास्की प्रहरीले सम्पत्ति शुद्धीकरणको कसुरमा पनि अनुसन्धान गरिरहेको छ । लामिछानेमाथि पोखराको सूर्यदर्शन, बुटवलको सुप्रिम, चितवनको साहारा सहकारी लगायतमा भएको रकम हिनामिनामा अनुसन्धान भइरहेको छ ।

यसैबिच रवि लामिछानेलाई भेट्नका लागि ठूला नेताहरुको लर्को लाग्ने गरेको छ । रवि लामिछानेलाई नेकपा माओवादी केन्द्रका उपमहासचिव जनार्दन शर्माले भेटेका छन् । आइतबार बिहान कास्की प्रहरी कार्यालय पुगेर लामिछानेसँग शर्माले करिब २० मिनेट भेट गरेको कास्की प्रहरी स्रोतले जनाएको छ ।

उनी बिहान ९ बजे जिल्ला प्रहरी कार्यालय कास्कीमा पुगेका थिए । त्यसै गरि राष्ट्रिय प्रजातन्त्र पार्टीका सांसद ज्ञानेन्द्र शाहीले पनि रविलाई भेटेका थिए । शाहीले लामिछानेलाई भेटेपछि लामिछानेलाई हिरासतमा राख्दा मानवअधिकारको गम्भीर उल्लङ्घन भएको जिकिर गरेका थिए । सांसद शाहीले लामिछानेलाई मदिरा सेवन गरेका प्रहरी परिचालन गरेर रातारात कास्की ल्याइएको पनि बताएका थिए ।

रवि लामिछानेले सांसद शाही भेट्न जाँदा आफूलाई चितवनबाट रक्सि खाएका प्रहरीहरुले जबरजस्ती रातारात पोखरा पु¥याइएको बताएका थिए । रविसँगको भेटवार्ता पछि शाहीले भने, ‘कानुनी राज्यमा छौँ, कानुन सबैले मान्नुपर्छ । तर यहाँ मानवअधिकारको गम्भीर उल्लङ्घन भएको छ । मदिरा सेवन गरेका प्रहरी परिचालन गरेर रातारात कास्की ल्याएको भन्नुभएको छ । यो गम्भीर घटना हो । सत्यतथ्य छानबिन गर्नुपर्छ ।’

लामिछानेले आफूलाई चितवनमा अमानवीय व्यवहार गरिएको कुरा पनि सुनाएको शाहीले बताएका थिए । प्रहरीले भने चितवनमा रविलाई बयानका लागि अदालत उपस्थित गराउँदा प्रहरी र रवि समर्थकबिच धकेला धकेलको स्थिति भएको भन्दै उज्यालोमा रविलाई पोखरा लैजाँदा थप घटना घट्न सक्ने भएको हुनाले रातको समयमा सुरक्षितका साथ लगिएको बताएको छ ।

गत शुक्रबार मात्रै पूर्व प्रधानमन्त्री डा. बाबुराम भट्टराईले रविलाई भेटेका थिए । उनले रविलाई भेटेर फर्किपछि रविलाई अनेक काण्ड लगाएर दुःख दिइएकोमा आफूलाई अस्वाभाविक लागेको बताएका थिए ।

कास्की जिल्ला प्रहरी कार्यालयको हिरासतमा रहेका लामिछानेलाई शुक्रवार बिहान भेटेर फर्किने क्रममा डा. भट्टराईले राज्यले रविमाथि राजनीतिक प्रतिशोध साँधेको हो कि भन्ने आशंका लागेको समेत बताएका थिए ।


प्रतिक्रिया दिनुहोस !
विचार