रुपन्देहीको भैरहवास्थित भीम अस्पतालमा दाँतको उपचारका लागि गएकी एक बालिकाले सुई लगाउनका लागि तयार ढक्कन निलेपछि तनाव उत्पन्न भएको छ । बिरामीका आफन्तले स्वास्थ्यकर्मीको गम्भीर लापरवाहीका कारण बच्चाले सुई निलेको विषय बाहिर ल्याएपछि घटनाले उग्ररुप लिएको हो ।
आइतबार दाँतबाट पिप निस्किने समस्या भएर उपचारका लागि अस्पताल पुगेकी ८ वर्षीया बालिका सुनिता कोहारको लगाउनुपर्ने सुई (ढक्कन) पेटभित्र गएको बताइएको हो । उनकी आमा आशा कोहारका अनुसार उनलाई उपचारका लागि आइतबार ९ बजे अस्पताल लगिएको थियो । उनको १० बजे चेकअप भएको र असहज भएपछि एक्सरे गरी हेर्दा सुई पेटमा गएको बताइएको छ ।
बालिकालाई अहिले दिशा गर्न पनि समस्या भइरहेको छ । तर अस्पतालका स्वास्थ्यकर्मीहरुले भने सुई नभएर त्यसको ढक्कन भएको र त्यो बच्चाको दिसाबाट बाहिर आउने बताइरहेका छन् ।
बिरामीका आमा आशाले सुई पेटभित्र जाँदासमेत अस्पतालले घरमा पठाइदिएकाले छोरीलाई अहिले घरमा ल्याएर राखेको बताइन् । साथै अस्पतालले उपचारका लागि धेरै खर्च लाग्ने बताएको समेत उनले बताइन् ।
बालिकाको उपचार डा. संगिता पन्थीले गरेकी थिइन् ।
