काठमाडौं । प्रधानमन्त्री बालेन साहले पुँजी बजार, धितोपत्र व्यवसाय तथा बीमा क्षेत्रका सरोकारवालासँग छलफल गरेका छन् ।
सोमबार प्रधानमन्त्री तथा मन्त्रिपरिषद्को कार्यालय, सिंहदरबारमा भएको छलफलमा पुँजी बजारको वर्तमान अवस्था, सुधारका आवश्यकता, नीतिगत व्यवस्था तथा समग्र अर्थतन्त्रसँग सम्बन्धित विषयमा छलफल भएको हो ।
छलफलमा नेपाल धितोपत्र बोर्ड (सेबोन) का अध्यक्ष गोपाल भट्ट, नेपाल स्टक एक्सचेन्ज (नेप्से) का अध्यक्ष अमृत लम्साल, स्टक ब्रोकर एशोसिएशन अफ नेपालका अध्यक्ष सागर ढकाल, नासा सेक्युरिटिजका सन्दीप जलान, नेप्सेका पूर्वप्रमुख कार्यकारी अधिकृत सीताराम थपलिया, नेपाल लाइफ इन्स्योरेन्सका प्रमुख नवराज सिलवाल तथा नागरिक स्टक डिलर कम्पनी लिमिटेडका प्रमुख कार्यकारी अधिकृत महेश्वरलाल श्रेष्ठ, प्रियाराज रेग्मीलगायत सहभागी थिए ।
छलफलपछि सञ्चारकर्मीसँग कुरा गर्दै सेबोनका अध्यक्ष गोपाल भट्टले पुँजी बजारको विकास र विस्तारका लागि आवश्यक सुधारका विषयमा छलफल भएको जानकारी दिए ।
उनले नेपाल राष्ट्र बैंक, नेपाल धितोपत्र बोर्ड, नेपाल स्टक एक्सचेन्ज तथा अर्थ मन्त्रालयसँग सम्बन्धित नीतिगत र कानुनी सुधारका विषयमा छलफल भएको बताए । प्रधानमन्त्री साहले पुँजी बजारको विकास, विस्तार र लगानीकर्ताको मनोबल बढाउने विषयमा चासो देखाएको उनले बताए ।
भट्टका अनुसार प्रधानमन्त्रीले पुँजी बजारलाई पुँजी परिचालनको महत्वपूर्ण माध्यमका रूपमा विकास गर्नुपर्ने र यसले रोजगारी सिर्जना तथा अर्थतन्त्रलाई सहयोग पुर्याउनुपर्ने धारणा राखेका थिए ।
छलफलमा पुँजी बजारमा देखिएका पछिल्ला घटनाभन्दा पनि बजारलाई दीर्घकालीन रूपमा कसरी स्वस्थ, पारदर्शी र प्रभावकारी बनाउन सकिन्छ भन्ने विषयमा केन्द्रित भएर छलफल भएको भट्टले बताए ।
छलफलमा लगानीकर्ताको घट्दो मनोबल सुधार गर्ने, बजारमा माग र आपूर्तिबीच सन्तुलन कायम गर्ने, संस्थागत लगानीकर्ताको भूमिका बढाउने, मार्जिन लेन्डिङको व्यवस्था सहज बनाउने, गैरआवासीय नेपाली (एनआरएन) को लगानी भित्राउने तथा स्टक एक्सचेन्जलाई प्रविधिमैत्री बनाउने विषयमा सुझाव दिइएको थियो ।
त्यस्तै, धितोपत्र बोर्डअन्तर्गत प्रारम्भिक सार्वजनिक निष्कासन (आईपीओ) प्रणाली सुधार, १० कित्ते आवेदन प्रणालीको पुनरावलोकन, बुक बिल्डिङ प्रक्रियालाई प्रभावकारी बनाउने, इन्ट्राडे कारोबार सञ्चालन गर्ने तथा नयाँ कारोबारका औजार विकास गर्ने विषयमा पनि छलफल भएको थियो ।
